暑假旅遊旺季就快到，係時候一家大細出外同陽光玩遊戲，但人在異鄉難免會有難以預計嘅狀況發生，加上一家人旅行，要兼顧嘅事實在太多，想玩得安心又盡興，就要從基本細節做足準備，萬一遇到意外，都能安然應付。

香港除咗因為航空樞紐嘅地位而擁有覆蓋十分廣泛嘅航空線路網絡外，更有旅遊業監管局（旅監局）管理嘅旅遊業賠償基金（賠償基金），為合資格嘅外遊人士提供保障，從大家選購旅遊服務組合時已為旅程設好安全網，之後就可以更全心全意享受旅程！究竟點先得到賠償基金嘅保障、何謂合資格外遊人士、萬一外遊遇到意外會有多少賠償等等嘅細節，更要了解清楚，就等我哋整理有關賠償基金嘅5個提問，睇完隨時出發都無問題！

旅監局提升業界水平 保障旅客權益

香港人熱愛旅行，旅監局正是為了確保旅客可得到專業而可靠嘅服務而成立。旅監局係根據《旅遊業條例》（第634章）喺2020年1月成立嘅法定監管機構，主要負責有關旅行代理商、導遊同領隊嘅發牌及規管事宜，亦負責提升旅遊從業員嘅誠信、能力同專業水平，並規管入境旅行團在安排下光顧的商店。而旅遊業賠償基金喺1993年根據《旅行代理商條例》（第218章）第32C條成立，旅監局自旅遊業新規管制度喺2022年9月1日實施之後開始接管關於持有、管理同運用賠償基金的權力，肩負起為外遊旅客提供保障嘅重任。以下5個常見疑問，一定可以幫你了解更多自己嘅旅遊權益：

1.    電子印花徵費係咩嚟？點樣查核電子印花徵費是否有效？

為咗令外遊旅客可以得到賠償基金嘅保障，根據《旅遊業條例》（第634章）第146條，持牌旅行代理商負有法律責任，需要就每筆已向外遊旅客收取咗嘅外遊費，向旅監局繳付相等於外遊費全數0.15%嘅印花徵費。喺持牌旅行代理商繳付印花徵費後，旅行代理商所發出嘅收據上就會見到印咗一個清晰顯示徵收金額同日期嘅電子徵費印花。

例如，如果你俾咗旅行代理商$12,000港元購買香港至北京機票連當地酒店住宿套票，張收據上嘅電子徵費印花就應該顯示已繳交$18港元嘅印花徵費，就好似下面嘅圖樣咁。如果大家俾咗外遊費後發現收據上無電子徵費印花、電子印花模糊不清、印花徵費額不足（少於已付外遊費全數嘅0.15%）或者收據和印花上所載的旅行代理商名稱和牌照號碼跟所光顧嘅旅行代理商不符，就要記得提你地幫襯嘅旅行代理商糾正返呀！

至於大家如果想查核收據上嘅電子印花徵費係咪有效，除咗可以透過旅監局電子印花徵費系統嘅網頁（），亦都可以用智能電話或平板電腦掃描電子印花上面嘅二維碼（QR Code）。

2.    購買什麼外遊服務先會喺收據上蓋上電子徵費印花？

根據《旅遊業條例》（第634章），外遊旅客指已向持牌旅行代理商支付外遊費購買關乎同一次旅程的任何以下各段描述的兩個或多於兩個服務及安排的外遊服務組合：

(a) 關涉在旅程中以任何交通工具提供的載運的服務，該旅程在香港境內開始，而其後主要在香港境外進行；
(b) 關涉在香港境外的住宿的服務；
(c) 某活動的安排，而該活動 ─
     (i) 並非附屬於(a)或(b)段所述的服務；
    (ii) 在香港境外進行；及
    (iii)（如該服務組合包括該活動）構成該服務組合的主要部分。

持牌旅行代理商需要向外遊旅客發出蓋上電子徵費印花嘅收據。

根據以上嘅定義，旅客如果向持牌旅行代理商購買以下任何一類嘅旅遊服務，相關收據就唔會蓋上電子徵費印花：

-    單獨購買機票、船票、巴士票的交易；
-    單獨購買酒店住宿的交易；
-    購買並沒有指明將用於兌換全部或任何兩項外遊服務組合的預付式旅遊禮券或旅遊現金券的交易。

3.    持有已蓋上電子徵費印花收據嘅外遊旅客，可以獲得賠償基金什麼保障？

如持有已蓋上電子徵費印花嘅收據，外遊旅客可以獲得賠償基金兩類嘅保障：

-    損失外遊費嘅保障：喺外遊旅客購買外遊服務後持牌旅行代理商倒閉嘅情況下，賠償基金可以為受影響旅客提供所損失外遊費90%嘅特惠賠償（按照簡化程序提出的申請所涉的最高款額為$15,000港元）。
-    喺外遊活動中遇上意外傷亡嘅保障：如果萬一唔好彩，外遊旅客喺持牌旅行代理商提供或舉辦嘅外遊活動中意外傷亡，係可以得到總數達$300,000港元嘅特惠賠償以報銷當地醫療、殮葬/遺體（包括骨灰）運返香港，以及親屬因旅客傷亡而往訪當地所招致嘅實際開支，每類有關開支都有最高嘅款額。

4.    外遊旅客透過網上旅行代理商購買外遊服務，會唔會受到賠償基金嘅保障？

只要旅客買咗關乎同一次旅程多過一項外遊服務（即係第2題所講嘅三項服務中嘅兩項或以上）並有電子徵費印花收據，都會受到賠償基金嘅保障。

但係大家如果透過網站購買外遊服務，記住要留意該網站是否持牌旅行代理商， 同埋喺付款後盡快向該持牌旅行代理商索取電子印花徵費收據。

5.    既然外遊旅客已受到賠償基金嘅保障，是否仍需購買旅遊保險？

雖然賠償基金能夠為外遊旅客提供一定嘅保障（即係第3題所講嘅兩類保障），但始終保障嘅項目同金額有限，外遊旅客出發前應該買番份適合自己嘅旅遊保險，雙重保障自己嘅旅程！

想知更多關於旅遊業賠償基金嘅詳情，可以瀏覽旅監局網頁：。

而有關於電子印花徵費嘅問題，可以聯絡旅監局，電話：3916 3212。

*資料旅監局網頁

鄭重聲明：本文版權歸原作者所有，轉載文章僅為傳播信息之目的，不構成任何投資建議，如有侵權行為，請第一時間聯絡我們修改或刪除，多謝。

標題：暑假外遊前做足功課 一文睇清「旅遊業賠償基金」　5大要點 去邊度都玩得安心又盡興

地址：https://www.twnewsletter.com/article/6089.html