福島核廢水｜日本排放核廢水 化學博士拆解10大影響！照食日本水產有無問題？
福島排放核廢水！日本福島第一核電廠預計於今日中午正式排放核廢水，食安問題引來全球關注，不少港人關注對人體影響，以及是否可以照食日本水產？香港大學化學系博士鄺士山（人稱 Dr. K Kwong），日前就於其個人Facebook專頁發文，以「食日本嘢」為題，向港人一次過拆解10大「核廢水」影響！
日本政府宣布，福島第一核電廠預計於今日（24日）當地時間下午1時（香港中午12時）開始，將核廢水排放入大海，港府早前宣布會於同日禁止源自東京、福島、千葉、栃木、茨城、群馬、宮城、新潟、長野和埼玉等10個都或縣的水產品進口，以確保香港的食物安全和公眾健康。
核廢水排放引來全球關注，尤其愛食日本水產的港人就更加擔心，到底食品日後會否受到核輻射影響？日後又應不應該進食？香港大學化學系博士鄺士山（人稱 Dr. K Kwong），日前就於其個人Facebook專頁發文，以「食日本嘢」為題，向港人一次過解答10大問題，更稱「我會飛去日本食」！
Dr. K Kwong 10大【Q&A】拆解「核廢水」影響：
1.【怕唔怕福島核電廠水？】
唔怕，因為濃度低。
2.【支持政府禁日本10個縣海產品嗎？】
唔支持禁，搵嘢嚟做。
3.【以後唔畀入口，對你有乜影響？】
冇乜影響，一向好少係香港食日本嘢，因為貴過日本好多，亦冇咁新鮮。我會飛去日本食！唔好同我爭！
4.【係咪你自己唔怕死咋？】
我個孫都食日本生果喎！
5.【咁你真係唔驚？】
我驚呀，我驚佢D核污水未排哂就再一次「東海大地震」，咁就一次過乜Q未處理過嘅污水就排哂落海，全球漁業真正大鑊。我短期內會再去日本玩，唔好同我爭！
6.【東海大地震嘅風險高嗎？】
好高，所以積埋咁多污水唔係好事。
7.【會影響日本生果嗎？】
唔會！唔會！唔會！海嘅水係上唔到陸地灌溉系統嘅。
8.【氚同碳14會永遠留係身體內嗎？】
唔會！唔會！唔會！佢哋生物半衰期得幾日。
9.【如果啲水冇事點解你唔攞嚟飲？】
係經過海水稀釋咗嘅水無事，即濃度低到冇影響，但係我唔會飲海水。尿都冇事我都唔會攞尿嚟飲喎！
10.【你賣X賊先至支持日本政府！】
唔係日本政府做嘅所有嘢我都支持，最重要係透明度。好多國家都冇透明度。
博士於貼文中更附上一張魚生飯相片，更打趣於圖片上標明「唔好同我爭」，引來大批網民讚好及留言。有現居日本的網民表示「住係日本都未驚啦」，都有網民認為「成件事係睇下信唔信東電姐」，獲博士回覆指「國際原子能協會係透明嘅」。
博士又解釋，生物半衰期是指生物體內停留的時間，「有好多放射性同位素唔能夠留喺骨，所以入咗身體好快排返出嚟。但有部分好似入到骨嘅鍶90 半衰期係30年。係骨就真係半衰期30年，但係血液就得20日」。部分網民亦表示，雖然濃度低，但會減少進食，建議自己衡量風險。
資料及圖片、HKET圖片庫
鄭重聲明：本文版權歸原作者所有，轉載文章僅為傳播信息之目的，不構成任何投資建議，如有侵權行為，請第一時間聯絡我們修改或刪除，多謝。
標題：福島核廢水｜日本排放核廢水 化學博士拆解10大影響！照食日本水產有無問題？
地址：https://www.twnewsletter.com/article/14506.html